Azərbaycan-Sloveniya əlaqələrinin inkişaf perspektivləri müzakirə olunub

Bakı, 26 oktyabr, AZƏRTAC

Oktyabrın 26-da Azərbaycan Respublikası Milli Məclisinin sədri Oqtay Əsədov ölkəmizdə səfərdə olan Sloveniya Milli Şurasının sədri Aloyz Kovşkanın başçılıq etdiyi nümayəndə heyəti ilə görüşüb.
AZƏRTAC xəbər verir ki, görüşdə Azərbaycan-Sloveniya əlaqələrinin perspektivləri müzakirə olunub.
Milli Məclisin sədri Oqtay Əsədov VI Bakı Beynəlxalq Humanitar Forumunda iştirak etdiyinə görə qonağa minnətdarlığını ifadə edib. O, belə səfərlərin ölkələrimiz arasında uğurlu əməkdaşlığın perspektivləri üçün geniş imkanlar yaratdığını vurğulayıb. Bildirilib ki, əlaqələrimizin inkişafında dövlət başçılarının qarşılıqlı səfərləri mühüm əhəmiyyət kəsb edir.
Görüşdə vurğulanıb ki, son illər Azərbaycan ilə Sloveniya arasında əlaqələr müxtəlif sahələr üzrə inkişaf edir. İndiyə qədər ölkələrimiz arasında 12 sənəd imzalanıb. İqtisadi əməkdaşlıq hazırda arzuedilən səviyyədə olmasa da, bunun inkişafı üçün hər iki ölkənin potensialı mövcuddur. Milli Məclisin sədri ümidvar olduğunu bildirib ki, digər sahələrdəki kimi, iqtisadi sahədə də inkişaf istənilən səviyyəyə çatacaq.
Azərbaycanın sürətlə inkişaf etdiyini diqqətə çatdıran Oqtay Əsədov dövlətimizin həyata keçirdiyi uğurlu layihələr barədə ətraflı məlumat verib.
Söhbət zamanı, həmçinin Ermənistan-Azərbaycan Dağlıq Qarabağ münaqişəsinə, Xocalı soyqırımına toxunulub. Qeyd olunub ki, 2014-cü ildə Sloveniya parlamentində Dağlıq Qarabağ münaqişəsinə, 2016-cı ildə isə Xocalı qətliamına dair qətnamələr qəbul edilib. Sədr Azərbaycanın haqlı mövqeyini dəstəklədiyinə görə Sloveniya tərəfinə minnətdarlığını bildirib.
Azərbaycanda ilk dəfə səfərdə olduğunu deyən Sloveniya Milli Şurasının sədri Aloyz Kovşka göstərilən qonaqpərvərliyə görə minnətdarlığını ifadə edib. O deyib ki, səfər çərçivəsində keçirilən görüşlərdə iki ölkə arasında inkişaf perspektivləri barədə müzakirələr aparılıb. Bu müzakirələr ölkələrimizin əməkdaşlığına mühüm töhfələr verəcək.
Aloyz Kovşka VI Bakı Beynəlxalq Humanitar Forumunda müzakirə edilən mövzuların aktuallığını qeyd edib, burada səslənən fikir və təkliflərin çox faydalı olduğunu vurğulayıb.