“Mədəniyyət” qəzeti VI Bakı Beynəlxalq Humanitar Forumuna xüsusi buraxılış həsr edib

Bakı, 25 oktyabr, AZƏRTAC

Azərbaycanın rəhbərliyi ilə həyata keçirilən “Bakı Prosesi” dünya miqyasında dinlərarası və mədəniyyətlərarası dialoqun inkişaf etdirilməsi üçün mühüm zəmin yaradır. 2008-ci ildə təməli qoyulan “Bakı Prosesi” ötən on ildə sivilizasiyalararası dialoqun qlobal platformasına çevrilib.
AZƏRTAC xəbər verir ki, bu fikir “Mədəniyyət” qəzetinin bu gün işə başlayan VI Bakı Beynəlxalq Humanitar Forumuna həsr olunmuş xüsusi buraxılışında vurğulanır.
Rus və ingilis dillərində materialların yer aldığı xüsusi nəşrdə Azərbaycan Respublikasının Prezidenti İlham Əliyev tərəfindən irəli sürülən “Bakı Prosesi” təşəbbüsünün tarixindən, bu platforma əsasında gerçəkləşən tədbirlərdən, ölkəmizin İslam dünyası və Qərb sivilizasiyası arasında dialoqun təşviq edilməsi istiqamətində səylərindən, Bakı Beynəlxalq Humanitar Forumunun bu kontekstdə rolundan bəhs olunur, VI Forumun prioritet və hədəfləri qeyd edilir.
Bildirilir ki, növbəti mötəbər tədbirin “Yeni dünya və yeni insan formalaşdıraq: yaradıcılıq və insan inkişafı” mövzusuna həsr olunması çağdaş qlobal təhdidlər qarşısında birgə çözüm yolları axtarmaq və dünyanı vahid məkan, bütün bəşəriyyəti bir cəmiyyət kimi görmək istəyindən irəli gəlir.
Xüsusi buraxılışda qeyd olunur ki, “Bakı Prosesi” təşəbbüsü Azərbaycanda tarixən mövcud olmuş mədəni müxtəliflik və tolerantlığın inkişaf etdirilməsinə, dünyada yayılmasına dövlətimizin dəstəyinin bariz göstəricisidir. Bu il yaranmasının 100 illiyi qeyd edilən müsəlman Şərqinin ilk demokratik respublikasının – Azərbaycan Xalq Cümhuriyyətinin sivilizasiyalararası dialoqa tarixi bir nümunə olduğu, Cümhuriyyətin bir əsr öncə dini, milli, sinfi, irqi, cinsi ayrı-seçkilik qoymadan bütün vətəndaşlarına bərabər hüquqlar təmin etdiyi vurğulanır.
Nəşrdə, həmçinin VI Bakı Beynəlxalq Humanitar Forumunun qonaqlarını Azərbaycanın zəngin tarixi-mədəni irsi barədə məlumatlandırmaq məqsədilə müxtəlif materiallar – müsahibə, reportaj və xəbərlər dərc edilib. Bu il yaranmasının 145 ili tamam olan Azərbaycan peşəkar milli teatrı, 120 illiyi qeyd olunan Azərbaycan kinosu, ölkə başçısının sərəncamları ilə yubileyləri qeyd edilən bəstəkar Qara Qarayev, opera müğənnisi Gülxar Həsənova, yazıçı İmran Qasımov, aktyor Həsən Turabov və başqa görkəmli sənətkarlar haqqında söz açılır, respublikamızda keçirilən ənənəvi festivallar, o cümlədən bu yaxınlarda gerçəkləşən Nəsimi Festivalı və davam etməkdə olan Bakı Caz Festivalından bəhs olunur, paytaxtın mədəni həyatı, incəsənət tədbirləri, Forum günlərində Bakının teatr-konsert müəssisələrinin repertuarı diqqətə çatdırılır.